ഫേസ്ബുക്കിലൂടെ കൊലവിളി നടത്തുന്ന പ്രവണത ഏറിവരികയാണ്. ഇത്തരത്തില്‍ പ്രധാനമന്ത്രിയെ കൊല്ലാനുള്ള ക്വട്ടേഷന്‍ ഏറ്റെടുക്കാന്‍ തയ്യാറാണെന്ന് ഫേസ്ബുക്കിലൂടെ തട്ടിവിട്ട യുവാവ് ഒടുവില്‍ പെട്ടു എന്നു പറഞ്ഞാല്‍ മതിയെല്ലോ. രാജസ്ഥാന്‍ സ്വദേശിയായ 31-കാരന്‍ നവീന്‍കുമാര്‍ യാദവിനെയാണ് ബജാജ് നഗര്‍ പൊലീസ് അറസ്റ്റുചെയ്തത്. പ്രധാനമന്ത്രിയുടെ പ്രവര്‍ത്തനങ്ങളില്‍ നിരാശനായതിനാലാണ് താന്‍ ഇത്തരത്തില്‍ അഭിപ്രായം പറഞ്ഞതെന്നാണ് യുവാവ് പൊലീസിനു നല്‍കിയ മൊഴി.
‘മോദിയെ കൊല്ലാനുള്ള കരാര്‍ നല്‍കാന്‍ ആരെങ്കിലുമുണ്ടോ? എന്റെ കൈവശം അതിനായുള്ള നല്ലൊരു പദ്ധതിയുണ്ട്’- മാര്‍ച്ച് 26-ന് നവീന്‍ തന്റെ ഫേസ്ബുക്കില്‍ ഇങ്ങനെ കുറിച്ചു. പോസ്റ്റ് പിന്നീട് പിന്‍വലിച്ചെങ്കിലും അപ്പോഴേക്കും പൊലീസില്‍ പരാതിയെത്തിയിരുന്നു.പ്രകോപനകരമായ പ്രസ്താവന, പൊതുസമാധാനം തകര്‍ക്കല്‍, ഭീഷണിപ്പെടുത്തല്‍ തുടങ്ങിയ കുറ്റങ്ങള്‍ ചുമത്തിയാണ് ഇയാള്‍ക്കെതിരേ കേസെടുത്തിരിക്കുന്നത്.
